ibnhujjah HABA JAMA'A KAR MU TSAYA MUNA YAUDARAR KAWUNANMU MANA Sanin kowa ne a yanzu muna rayuwa cikin wata al'uma da bata ganin Kimar shuwagabanninta kai harma da Malamanta, sau da dama mutane sai su je su kitsa sharri da kawunansu sai kuma su zo su kallafawa Malamansu kan dole sai sun warware wannan sharrin ko da kuwa basu da masaniya akan abun. Mafi yawancin balahirar dake faruwa a wannan zamani ana kitsa su ne ta kafafen sadarwa na zamani kuma mune muke kitsasu sannan kuma sai mu zo muna zargin Malamanmu akan dan me ba suyi magana akan kaza da kaza ba alhalin mafi yawancin malaman ko Facebook basa yi balle WhatsApp uwa-uba Instagram da sauran kafafen sadarwa na zamani. Yanzu kai da ka dauki Hoton wasu na batsa ko kalamai mararsa kyau da wani ya rubuta kana yadawa aikin alkairi kayi ko na sharri? kai baza ka iya yin nasiha ga yan uwanka bane? ko kuwa iya sharri kawai ka iya yadawa? ko ka manta da umurnin Manzon Allah SAW dangane da wanda ya ga Munkari (abun ki)? Hakika Manzo SAW Yace ''wanda ya ga abin Ki daga cikinku to ya canja shi da hannunsa ko da harshensa, idan duk hakan bai yiwu ba to ya kyamaci abin a cikin zuciyarsa wannan shine mafi raunin imani''. Idan zamu kalli wancan Hadisi da kyau zamu ga babu inda Manzo SAW Yace lallai sai Malamai ne kadai zasu kawar da 6arna ko yin nasiha a cikin al'umma, saboda haka wajibi a gareni da kai idan munga abin Ki muyi kokarin kawar dashi ta hanyoyin da zamu iya idan kuma ya gagaremu to mu kyamaci abin a cikin zukatanmu. Hakika Malumanmu na Sunnah suna iya bakin kokarinsu dare da rana wajen sauke nauyin da Allah Ya dora musu, don haka kaima kayi kokari ka sauke nauyi da yake akanka, kar mu sake wasu yan duniya suyi amfani da mu wajen cin mutunci da 6atanci ga wasu daga cikin Malamanmu. Allah Yasa mun gane.